NZZ Folio 04/05 - Thema: Beim Zahnarzt   Inhaltsverzeichnis

villecht nach ungarn

Von Ernst Burren
dr choschtevoranschlag vom zahnarzt
isch über zwänzgtuusig franke

das gäut hei mir nit
mir müesstes
uf ere bank ufnäh

dr alex meint
i söui doch mis bis
z ungarn lo flicke
es gäbi jo gäng wie meh schwizer
wo in ungarn zum zahnarzt göngi
wüus dört vüu büuiger chömi

i überlegge mir die möglichkeit
und wirde mi
bi lüt erkundige
wo z ungarn scho
bim ene zahnarzt si gsi

villecht chönnte mir die zahnarztbsüech
grad mit ferie verbinge
budapescht sigi jo e wunderbari schtadt

jetze chönnti son e grosse betrag zale
und i paar johr
si wider angeri zäng kabutt
wo vüu würde choschte
vo dene zängproblem
hani scho langsam gnue

mi zahnarzt macht e guete idruck
drumm chani fasch nit gloube
dass är sit mängem johr
jede tag i frömde müüler umeboret
ohni dass es ihn eklet
s mues eine äuä scho
ne bsungere mönsch si
dass är eso ne bruef cha usüebe

aber villecht macht är
das gar nid es läbe lang
und hört uf
wenn är gnue uf dr site het
är het jo immer vüu paziänte

mini öutere hei bedi es bis gha
und si zfride gsi drmit
villecht wärs s gschiidschte
i würdi mini zäng aui lo zieh
und ou es bis lo mache
de hätti ändlich ruei
und chöschte hätti ou nie meh
wäge dene blöde zäng

mit dämm gäut wo mir am zahnarzt
müesste zale
chönnte mir es nüis outo choufe
vo dämm hätte mir de meh drvo

denn woni znacht
eso wahnsinnig schmärze ha übercho
dass i gmeint ha
i hautis nümme us bis am morge
bini froh gsi dass i scho am sibni
ha zuen em chönne

won är das brüggli obe links
ändlich het chönne löse
und s eiter absuuge
wo sich dört het agsammlet gha
hani töif ufgschnufet
und bin em dankbar gsi

dass är mi vo dene schmärze het erlöst
e wurzubehandlig loni sowiso
nie meh lo mache
do wirdsch jo wahnsinnig

bis dr zahnarzt
mit dene dutzende vo schtebli
i dämm loch het umegrüblet
bis es de ändlich suuber isch
für so ne igriff bini eifach z sensibu

natürlich mues är mir
immer grad e schprütze mache
i säg em gäng
ohni schprütze wird nid
i mim muu umegüferet
schliesslich bini de ou nume e mönsch

i gloube das isch s beschte
wenn i jetze aus erschte schritt
lon e choschtevoraschlag mache
für nes bis

wenn die chöschte ou z höch si
goni haut nach ungarn
jetze gits jo büuigflüg
vo dene sött me
sowiso profitiere

übrigens sige die dütsche zahnärzt
ou vüu büuiger aus üsi schwizer
i mues mi z waldshuet erkundige
wenn mir s nöchschte mou
üsi ichöif dört mache
Teilen

Für 94 Franken pro Jahr gibt es NZZ Folio auch im Abonnement. Näheres hier.

Urheberrecht gilt auch im Internet: Verlinken erlaubt, Kopieren verboten.